ՀՀ ազգային ժողովը լիագումար նիստերի օրակարգում կքննարկի «Լուսավոր Հայաստանի» ներկայացրած օրենքի նախագիծը, որով առաջարկվում է պայմանագրային զինվորական ծառայության մեջ գտնվելու սահմանային տարիքը բարձրացնել՝ 45-ի փոխարեն սահմանելով 63:
«Արմենպրես»-ի հաղորդմամբ՝ «Զինվորական ծառայության եւ զինծառայողի կարգավիճակի մասին» Հայաստանի Հանրապետության օրենքում փոփոխություններ կատարելու մասին օրենքի նախագիծը ԱԺ պաշտպանության և անվտանգության հարցերի մշտական հանձնաժողովի նիստում ներկայացրեց ԼՀԿ ղեկավար Էդմոն Մարուքյանը:
«Պատերազմից անմիջապես հետո մենք խնդիր ունենք պայմանագրային զինծառայողներով ավելի շատ համալրելու մեր բանակը, ԶՈՒ-ն: Եվ Կապանում, Գորիսում ապրող մեր հայրենակիցներից ստացել ենք առաջարկություն, որ օրենքի համապատասխան դրույթը, որի համաձայն՝ 45 տարեկանից հետո անհնար է շարունակել պայմանագրային զինվորական ծառայությունը, փոփոխել ու ներկայացնել օրենքի նախագիծ, որով հնարավորություն տրվի բարձրացնել այդ շեմը: Մենք առաջարկում ենք շեմը բարձրացնել մինչև 63 տարեկանը»,-ասաց Մարուքյանը:
Ընդ որում, նա նկատեց, որ բարձրագույն սպայական կազմի համար շեմը բարձր է: «Եթե մարդը գեներալ է, ուզում ենք պահել բանակում, բայց եթե, օրինակ, ենթասպա է, 45-ից հետո ասում ենք՝ զորացրվիր»,- նշեց Մարուքյանը:
Այսպիսով, նախագծով պայմանագրային զինվորական ծառայության մեջ գտնվելու սահմանային տարիքը սահմանվում է մինչեւ 63 տարեկանը, իսկ բարձրագույն սպայական կազմի «գեներալ-գնդապետ» եւ «բանակի գեներալ» զինվորական կոչումներ ունեցող զինծառայողների համար՝ մինչեւ 65 տարեկանը:
Պաշտպանության փոխնախարար Արման Սարգսյանը, ողջունելով նախաձեռնության բարի միտումները, ներկայացրեց կառավարության առարկությունները: «Օրենքով զինծառայողների կազմի զինվորական ծառայության անցնելու սահմանային տարիքների նախատեսումը չի հանդիսանում բացառապես ՀՀ զինված ուժերին բնորոշ կարգավորում, այն ընդունված է աշխարհի բոլոր պետությունների ԶՈՒ-երում, հիմքում ունի զինվորական ծառայության կազմակերպման այնպիսի սկզբունքների ապահովման անհրաժեշտւթյուն, ինչպիսիք են անձի ֆիզիկական և առողջական վիճակի համապատասխանությունը զբաղեցրած կամ առավելագույն զբաղեցման ենթակա զինվորական պաշտոնին և զինվորական ծառայությունից բխող գործառույթներին, զինված ուժերի պատշաճ կադրային քաղաքականության իրականացումը… Բացի այդ, զինվորական ծառայության մեջ գտնվելու սահմանային տարիքների հետ անմիջական կապի մեջ է գտնվում ԶՈՒ-ի պահեստազորի համակարգը, որը ևս ձևավորված է պահեստազորայինների տարիքային սկզբունքով, ինչի հիման վրա զինծառայողը չի կարող զինվորական ծառայության մեջ գտնվել ավելի բարձր տարիքում, քան նախատեսված է պահեստազորում հաշվառման համար»,- ասաց Սարգսյանը:
Այդուհանդերձ, նա վստահեցրեց, որ «Զինվորական ծառայության եւ զինծառայողի կարգավիճակի մասին» օրենքում կատարվող փոփոխություններում նախատեսում են սահմանային տարիքների վերանայում՝ որոշակի բարձրացման միտումներով: Նրա խոսքով՝ ստեղծելու են ավելի ճկուն համակարգ:
Նախագիծը հանձնաժողովում քվեարկությամբ ստացավ դրական եզրակացություն, կքննարկվի ԱԺ լիագումար նիստում:
