ՌԴ նախագահ Վլադիմիր Պուտինը Վլադիվոստոկում Արևելյան տնտեսական համաժողովի լիագումար նիստում մեկնաբանել է ռուսաստանցիների հոսքը Հայաստան:
«Մենք ողջունում ենք այն ամենը, ինչը ձեռնտու է ռուսական բիզնեսին։ Եթե պայմաններն այնպիսին են, որ հիմա մարդկանց, իսկ դրանք հիմնականում ՏՏ ոլորտի մասնագետներ են, նպատակահարմար է, ավելի շահավետ ու հանգիստ աշխատել այնտեղ, ապա, ի սեր Աստծո, թող աշխատեն։ Հայաստանը մեզ համար օտար երկիր չէ, մեր կողքին է, կարելի է աշխատել Երևանում, բայց ապրել, փաստորեն, Մոսկվայում»,- նշել է Ռուսաստանի նախագահը։
«Շատերն արդեն վերադարձել են։ Հասկացան, որ այստեղ ոչ մի սարսափելի բան տեղի չի ունենում՝ հաշվի առնելով նույնիսկ Ռուսաստանի նկատմամբ որոշ երկրների ագրեսիվ պատժամիջոցները: Ամեն ինչ աշխատում է, ամեն ինչ գործում է, ամեն ինչ կայուն է։ Եթե ինչ-որ մեկին դուր է գալիս աշխատել Հայաստանում՝ խնդրեմ»:
Ռուսաստանի նախագահը նշել է, որ կարելի է աշխատել նաև Ղազախստանում, որտեղ ստեղծվել է լավ ֆինանսական գոտի, և, ընդհանրապես, «մեզ ավելի հեշտ է կարգավորել ԵԱՏՄ երկրների հետ կապված ամեն ինչ, մարդկանց էլ ավելի հեշտ է աշխատել»։
Ավելի վաղ Էլեկտրոնային հաղորդակցությունների ռուսական ասոցիացիան հայտնել էր, որ մարտին Ռուսաստանը լքել է 50-70 հազար ՏՏ մասնագետ, իսկ ապրիլին ևս՝ 70-100 հազար մարդ, մոտ 49 հազարը ժամանել են Հայաստան: Այս ֆոնին ՌԴ իշխանությունները միջոցներ են ձեռնարկել ՏՏ ոլորտի աշխատողներին աջակցելու համար, նրանք կարող են զինծառայությունից տարկետում ստանալ և շահավետ պայմաններով հիփոթեք ստանալ։ Մայիսի վերջին վարչապետ Միխայիլ Միշուստինը հայտնել էր, որ վերջերս երկիրը լքած ՏՏ ոլորտի աշխատողների մոտ 85%-ը վերադարձել է Ռուսաստան։
