Ճապոնիայի Իսիկավա պրեֆեկտուրայում նախօրեին տեղի ունեցած երկրաշարժերի զոհերի թիվը հասել է 48-ի։ Այս մասին հաղորդում է Kyodo գործակալությունը՝ հղում անելով տեղի իշխանություններին։
Նշենք, որ ավելի վաղ հաղորդվում էր 30 զոհի և տասնյակ տուժածների մասին։
Առավել շատ զոհեր են գրանցվել Սուձու քաղաքում․ այստեղ մահացել է 20 մարդ։ Վաձիմայում, որը համարվում է երկրաշարժերից ամենաշատը տուժած քաղաքներից մեկը, զոհերի թիվը հասել է 19-ի։ Միայն այս քաղաքում հաղորդվել է փլուզման 14 դեպքի մասին։ Բացի այդ, այնտեղ մասամբ կամ ամբողջությամբ այրվել է ավելի քան 200 տուն։
Հիշեցնենք, որ երեկ՝ հունվարի 1-ին, կենտրոնական Ճապոնիայում ավելի քան 40 երկրաշարժ է տեղի ունեցել, որոնցից ամենահզորը 7,6 մագնիտուդ ուժգնությամբ՝ ամենաուժեղն է Ճապոնիայի այս տարածքում 1885 թվականից ի վեր:
2011 թվականից ի վեր առաջին անգամ հայտարարվել է «մեծ երկրաշարժի» վտանգ, իսկ երկրի ամբողջ արևմտյան ափի համար հայտարարվել է ցունամիի վտանգ։
