ՀՀ կառավարությունը դրական եզրակացություն է տվել Հայաստանի Հանրապետության կառավարության 2007 թվականի փետրվարի 1-ի Ն 201-ն որոշման մեջ փոփոխություն և լրացումներ կատարելու մասին նախագծին, որով առաջարկվում է վերանայել դպրոցներում և արտադպրոցական հաստատություններում մանկավարժների աշխատաժամանակը:
«Կառավարության ծրագրի և կրթության ռազմավարության կարևորագույն թիրախ է հանրակրթության ոլորտի բովանդակային բարեփոխումը, որն արդեն մենք տևական ժամանակ է՝ նախապատրաստում, փորձարկում ենք, և այս տարվա սեպտեմբերից արդեն իսկ սկսել ենք հանրակրթության նոր պետական չափորոշչի փուլային ներդրումը բոլոր դպրոցներում»,- Կառավարության՝ հոկտեմբերի 5-ի նիստում ասաց ԿԳՄՍ նախարար Ժաննա Անդրեասյանը:
Նրա խոսքով՝ նոր չափորոշիչը մի շարք նոր պահանջներ է առաջադրում ուսուցիչներին, որոնք կապված են գնահատման համակարգի փոփոխությունների, դասի պլանավորման և անցկացման, որակական նոր պահանջների հետ, ինչպես նաև կրթական մեթոդների բազմազանեցման, երկարօրյա հավելյալ դասընթացների կազմակերպման և մի շարք այլ նոր խնդիրների հետ, որոնք առաջին հերթին միտված են բարձրացնելու կրթության որակը մեր դպրոցներում:
«Ըստ այդմ` անհրաժեշտություն է առաջացել վերանայել ուսուցչի կողմից շաբաթական դասավանդվող ժամերի թիվը՝ նվազեցնելով դրանք և աշխատաժամանակ ազատելով ուսուցչի մյուս կարևոր անելիքների համար, որոնք էական ազդեցություն ունեն կրթության որակի վրա: Ներկայումս ուսուցչի շաբաթական մեկ դրույք ծանրաբեռնվածությունը կազմում է 22 դասաժամ, ինչը պրակտիկորեն թույլ չի տալիս նշված խնդիրները լուծել: Պետք է հաշվի առնել, որ հանրակրթության նոր պետական չափորոշչով տարրական դասարաններում միավորային գնահատման համակարգը չի գործում, և ուսուցիչները զգալի ժամանակ պետք է հատկացնեն ձևավորվող գնահատման մեթոդներով սովորողների հետ աշխատելու համար: Նախագծով առաջարկվում է 1-4-րդ դասարաններում դասավանդող ուսուցիչների համար շաբաթական դասավանդման ժամերը սահմանել 1 դրույքի համար 18 ժամ, 5-12-րդ դասարաններում՝ 20 ժամ: Սա կհանգեցնի տարրական դասարանների ուսուցիչների 1 դրույքի վարձատրության, ըստ էության, 20 տոկոս աճին, 5-12-րդ դասարաններում՝ 10 տոկոս աճին: Այս փոփոխությանն առաջարկվում է գնալ փուլային տարբերակով՝ հանրային պետական չափորոշչի ներդրման գործընթացին զուգընթաց»,- նշեց Ժաննա Անդրեասյանը:
Նա հիշեցրեց, որ սեպտեմբերից նման ձևաչափով արդեն կարգավորվում են 2-րդ 5-րդ, 7-րդ դասարանների դասավանդման գործընթացները, մյուս ուսումնական տարվանից կավելանա ևս 4 դասարան, և մյուս տարում՝ մյուս դասարանները:
«Այս նախագծի ընդունումը կնպաստի ոչ միայն ուսուցիչների աշխատավարձի բարձրացմանը, այլև կրթության որակի բարելավմանը, քանի որ մանկավարժական տեսանկյունից շաբաթական դասավանդման ժամերը, ինչպես հիմնավորված է տեսությամբ և հետազոտություններով, չպետք է գերազանցեն 20 ժամը»,- ասաց նախարարը:
Նա նշեց, որ նույն նախագծով կարգավորվում է արտադպրոցական հաստատություններում մանկավարժների միասնական աշխատաժամանակի խնդիրը: «Ըստ այդմ՝ առաջարկվում է արտադպրոցական հաստատություններում կիրառել շաբաթական 20 ժամ դասավանդելու սկզբունքը և այս դրույթի ուժի մեջ մտնելու ժամկետ սահմանել 2026 թվականի սեպտեմբերի 1-ը՝ հաշվի առնելով, որ սրանից բխող ֆինանսական հետևանքներ կան և որոշակի ժամանակահատված է անհրաժեշտ, որ համայնքներն իրականացնեն համապատասխան փոփոխությունները»,- ասաց Ժաննա Անդրեասյանը:
