Ռուսաստանում վարորդներին արգելվում է ինքնուրույն «ամրագրել» իրենց համար ավտոկայանատեղի բազմաբնակարան շենքերի բակերում։ Այս մասին հայտարարել է Պետդումայի շինարարության և բնակարանային կոմունալ տնտեսության կոմիտեի փոխնախագահ Սերգեյ Կոլունովը։ Նրա խոսքով՝ վարորդների նման գործողությունները փաստացի համարվում են «հողի ինքնակամ զավթում»։
Նա հստակեցրել է, որ այն ավտոմեքենաների սեփականատերերին, որոնք, օրինակ, տարբեր իրերով փակում են կայանատեղին, սպառնում է տուգանք։ Դրա նվազագույն չափը կազմում է 5 հազար ռուբլի։
«Ավտոկայանատեղի ինքնակամ փակման համար կարող է սպառնալ պատասխանատվություն ՌԴ Վարչական իրավախախտումների օրենսգրքի 7.1 հոդվածով («Հողամասի ինքնակամ զբաղեցում»)», — ընդգծել է Կոլունովը TASS-ին տված հարցազրույցում։
Պատգամավորը բացատրել է, որ եթե տվյալ կայանատեղիի կադաստրային արժեքը որոշված չէ, ապա ֆիզիկական անձանց համար տուգանքը կկազմի 5-ից 10 հազար ռուբլի։ Ի պաշտոնե անձինք կվճարեն 20-ից 50 հազար ռուբլի, իսկ իրավաբանական անձինք՝ 100-ից 200 հազար ռուբլի։
Եթե հողամասի կադաստրային արժեքը որոշված է, տուգանքի չափը կկարգավորվի այլ կերպ։ Այդ դեպքում վարորդը ստիպված կլինի վճարել հողի գնի 1%-ից մինչև 1,5%-ը, բայց ոչ պակաս, քան 5 հազար ռուբլի։
Կոլունովը հավելել է, որ ներկայումս գոյություն ունեն օրինական մեթոդներ, որոնց միջոցով վարորդները կարող են ամրագրել իրենց համար ավտոկայանատեղի։ Նրա խոսքով՝ դրա համար անհրաժեշտ է կազմակերպել սեփականատերերի ընդհանուր ժողով, որտեղ պետք է ընդունվի որոշում՝ տեղադրել պատնեշներ կամ առանձնացնել առանձին տեղեր։ Անհրաժեշտ է ստանալ սեփականատերերի մեծամասնության համաձայնությունը։ Դրանից հետո վերջնական որոշումը կկայացնի տարածքային իշխանության մարմինը։ Սակայն անգամ այս համաձայնությունը չի արգելում շենքի բնակիչներին կամ հյուրերին կայանել ազատ տեղերում։
